Kërkojnë kthimin e Berlusconit

Partia e Silvio Berlusconit dëshiron që në zgjedhjet e ardhshme të përgjithshme sërish ta nominojë për kryeministër, njoftoi lideri i partisë, Angelino Alfano, ndonëse pohoi se ende s’është marrë një vendim definitiv për këtë çështje.

“Ai ende nuk ka vendosur”, theksoi Alfano, ndonëse, sipas tij, në parti po “i bëhet presion Berlusconit për të garuar, meqë është më i fuqishmi, dhe për shkak se mund të bëjë shumë për Italinë”.

bazuar në një hulumtim të 14 korrikut, ditorja ‘La Repubblica’ pohon se një koalicion i qendrës së djathtë, i udhëhequr nga Berlusconi, do të fitonte 30 përqind të votave – ndonëse këtë përqindje do ta fitonte edhe nëse Alfano të ishte kandidati kryesor. Nga i njëjti hulumtim rezulton se 64 përqind e italianëve kanë mendim negativ për qeverinë e fundit të Berlusconit.

Berlusconi ishte kryeministër italian në periudhat 1994-1995, 2001-2006 dhe 2008-2011.

Muajin e kaluar Berlusconi bëri me dije se do të rikthehet në politikë megjithëse kandidimi i tij për kryeministër nuk është konfirmuar zyrtarisht.