Komenti/Rusia dhe lufta e nervave për Sirinë

Para një muaji ministrat e jashtëm të Rusisë dhe SHBA ranë dakord për një konferencë ndërkombëtare për zgjidhjen e konfliktit në Siri. Ende duhet të sqarohen detaje, por fitoret e Asadit e forcojnë pozicionin e Moskës. Gjeneva duhet të bëhet një Dejton i dytë, shpreson Dmitri Trenin. "Amerikanët dhe rusët duhet t’i sjellin në të njëjtën tryezë përfaqësuesit e Sirisë dhe t’i detyrojnë ata të bien dakord", i thotë DW-së drejtori i Qendrës Carnegie në Moskë. "Kjo do të kërkonte një aleancë diplomatike mes Rusisë dhe Amerikës në çështjen e Sirisë." Por për momentin, shanset për këtë nuk janë "shumë të mëdha", mendon Tritin. Rusia do ta pajisë Sirinë me sisteme të mbrojtjes ajrore. Rusia do ta pajisë Sirinë me sisteme të mbrojtjes ajrore. Në fillim të majit, Rusia dhe SHBA avancuan për herë të parë që prej fillimit të luftës civile në Siri drejt pozicioneve reciproke. Me propozimin e tyre, që si në vitin 2012 të organizohet një konferencë ndërkombëtare për Sirinë ministri i jashtëm rus, Sergej Lavrov, dhe homologu i tij, John Kerry, tërhoqën vëmendjen ndërkombëtare. Eksperti moskovit Trenin sheh në këtë një sinjal, që Uashingtoni, njësoj si Moska, synon një dakordim politik dhe dëshiron ta shmangë një shkallëzim ushtarak në rajon.
Por përgatitja e konferencës rezulton e vështirë. Më parë qe planifikuar që ajo të zhvillohej në maj, tani si koha më e hershme përmendet korriku. Këtë e bëri të ditur zëvendësministri i jashtëm rus, Gennadi Gatilow, pas bisedimeve me përfaqësues të SHBA dhe të OKB-së në Gjenevë të mërkurën. Rusia e sheh të realizuar detyrimin e saj, duke e bindur qeverinë siriane, që të marrë pjesë në konferencë. Nëse në konferencë do të jenë të pranishme forca opozitare dhe sa të tilla, kjo është e hapur. Megjithë iniciativën e përbashkët: diferencat midis Rusisë dhe SHBA mbeten. Ministri i jashtëm rus Lavrov i akuzoi SHBA për një "deformim të fortë" të paraqitjes së marrëveshjes. Komentet e fundit të State Departamentit, në bazë të të cilave konferenca e Sirisë ka si synim shkarkimin e qeverisë aktuale, janë të gabuara, tha Lavrovi. Nga këndvështrimi i Moskës në Gjenevë do të diskutohet formimi i një qeverie, në të cilën të marrin pjesë si pushtetmbajtësit aktualë, ashtu edhe opozita. Rusia nga ana tjetër njofton për dërgime të reja armësh Sirisë. Kështu Damasku mund të marrë më shumë se 10 avionë luftarakë rusë, u bë e ditur në Moskë. Më parë dërgimi i raketave kundërajrore nga Rusia të tipit S-300 tërhoqi vëmendjen ndërkombëtare. Që prej 1 janarit 2013 marina ruse e ka shtuar praninë në Mesdhe. Një grup prej 16 anijesh lufte ruse planifikon ndër të tjera edhe një vizitë në portin sirian, Tartus, ku Rusia ka një bazë marine.