Komisioni i Jashtëm miraton 4 ambasadorët

Komisioni parlamentar i Politikës së Jashtme zhvilloi  dje një seancë dëgjimore me katër kandidatë për ambasadorë, Sokol Gjokën në Federatën Ruse, Fatos Kërçiku në Republikën e Indisë, Nuri Domi në Republikën Arabe të Sirisë dhe Egjipt, si dhe Gazmend Barbullushin në Mbretërinë e Hollandës. Pas seancës së zhvilluar pa praninë e përfaqësuesve të Partisë Socialiste, kryetari i komisionit Preç Zogaj tha për gazetarët, se deputetët  i vlerësuan pozitivisht të katër kandidaturat e paraqitura, të cilët janë diplomatë karriere. "Të gjithë deputetët e pranishëm në komision dhanë mbështetje për emërimin e tyre dhe këtu uroj që dhe Presidenti i Republikës t'i dekretojë sa më shpejt të jetë e mundur", tha Zogaj. Duke theksuar se me këto kandidatura i jepet përgjigje dhe shqetësimeve për plotësimin e vendeve vakante në disa seli diplomatike, Zogaj sqaroi dhe mungesën e deputetëve të PS-së në mbledhjen e sotme të komisionit."Shpreh keqardhje për mospraninë e tyre, por socialistët janë të mendimit se nuk duhen emëruar ambasadorë para zgjedhjeve. Zgjedhjet janë në horizont, nuk janë kaq afër dhe mendoj se duhet ta shkëpusim konceptin e zgjedhjeve nga koncepti i emërimit të ambasadorëve. Diplomacinë duhet ta shohim përtej ngjarjeve politike, siç janë zgjedhjet", tha Zogaj.
Sipas tij "Presidenti i Republikës, që në funksionet e veta përfaqëson jo vetëm unitetin e popullit, por dhe vazhdimin e pushtetit, kur bëhen zgjedhje apo ka ndryshime politike në parlament, është kompetent që të emërojë ambasadorë edhe ditën e zgjedhjeve. Por, sipas pikëpamjes së maxhorancës, nënvizoi Zogaj ligji është në fuqi dhe zbatohet kurdoherë dhe nuk ka asnjë arsye për moratorium, sepse nuk kemi të drejtë.