Kosova pa perspektivë për anëtarësim në BE

Komisioni Evropian në raportin e tij vjetor, i cili do të publikohet më 12 tetor, do të rekomandojë që Serbisë t’i jepet statusi i kandidatit për BE. Por, ky shpërblim mund të mos ndodhë pasi Gjermania do ta kundërshtojë për arsye se Serbia përkrah grupet paramilitare serbe dhe gangsterët serbë në Veri të Kosovës.

Sa u përket aspirantëve tjerë të Ballkanit për të hyrë në BE, raporti konfirmon se Kroacia “do të jetë” në gjendje të anëtarësohet në BE më 1 korrik 2013, meqë Zagrebi cilësohet “si një nxitës dhe katalizator (për reformat pro-BE) për pjesën tjetër të rajonit”.

Mali i Zi dhe Maqedonia dolën të parat sa i përket progresit në reforma. Por, komisioni nuk thotë se kur ato dy shtete kandidate mund t’i nisin bisedimet për anëtarësim. Shqipëria thuhet se ka bërë “progres të limituar”, si pasojë e një bllokade politike pas zgjedhjeve të janarit. Ndërsa, Bosnja përshkruhet si një shtet “i paralizuar dhe i konfrontimeve” në mes të serbëve dhe myslimanëve, me “mungesë të kuptueshmërisë së përbashkët në drejtimin dhe të ardhmen e përgjithshme të vendit”.

Kosova, sipas raportit që e ka parë “EUobserver” dhe e transmeton “Zëri”, nuk ka asnjë perspektivë për anëtarësim në BE, derisa të gjitha 27 vendet e bllokut ta njohin atë si shtet. Raporti thekson se papunësia në Kosovë është më e larta në Evropë dhe se “duhet bërë shumë më shumë për ta luftuar krimin e organizuar dhe korrupsionin”.

Në raport shkruan gjithashtu se Brukseli “i merr shumë seriozisht” pretendimet se kryeministri i Kosovës, Hashim Thaçi, ka drejtuar një grup të krimit të organizuar 10 vjet më parë dhe se ka shitur organet e brendshme të të burgosurve serbë dhe që vazhdon t’i kërcënojë jetët e dëshmitarëve potencialë në përpjekjet e BE-së për ta hetuar rastin sot.