Kult nderon dhe Drita Pelinkun e Vaçe Zelën
2 çmime speciale për aktoren e skenës, Drita Pelinku dhe për këngëtaren e madhe shqiptare Vaçe Zela. Përtej parashikimeve ka pasur artistë që e kanë marrë për herë të dytë kupën siç ka qenë edhe aktorja Yllka Mujo që është cilësuar aktorja më e mirë e vitit. Ndërsa të tjerë që janë nominuar për vite me radhë më në fund kanë mundur të marrin kupën Kult, siç ka qenë shpallja si skenografi i vitit i Genc Shkodranit apo instrumentistja më e mirë që ishte pianistja Merita Rexha. Një surprizë në çmimet Kult ka qenë Kushtrim Bekteshi, i cili u shpall regjisori më i mirë i vitit për regjinë e Kush ka frikë nga Virginia Woolf. Shkrimtari i vitit u shpall Bashkim Shehu për veprën e tij Mozart me vonesë, ndërsa studimi me i mirë i takoi studiuesit Ferit Duka, ndërsa si përkthyesi i vitit 2009 u shpall Aurel Plasari për shqipërimin e poezive të Ana Ahmatoves. Në një spektakël që zgjati më shumë se dy orë janë ngjitur artistë që kanë marrë dhe të tjerë që kane dorëzuar çmime, duke u përpjekur ta kthejnë këtë mbrëmje në një festë për artin shqiptar. Kështu albumi i vitit, shkoi për Kujtim Prodanin.
Jeton Neziraj çon Shembja e Kullës së Eifelit, në skenën franceze
Në teatrin Ephemeride, në Val De Rouil të Francës para publikut francez po prezantohet drama më e re e dramaturgut kosovar Jeton Neziraj, Shembja e Kullës së Eifelit. (LEffondrement de la Tour Eiffel). Kjo dramë do të ketë kontaktin e parë me publikun francez në formën e leximit skenik, përmes aktorëve të kompanisë Ephemeride. Përndryshe, drama është shkruar gjatë muajve shkurt- maj të këtij viti, që ka kulmuar me një proces intensiv pune në rezidencën e shkrimit në teatrin Ephemeride. Shembja e Kullës së Eifelit flet për traumat e njeriut modern. Hose, personazhi kryesor, kalon nëpër një ëndërr të çuditshme, si rezultat i traumave që i janë pleksur nga informacionet e shumta që ai merr nga gazetat. Drama në frëngjisht është përkthyer nga aktori i mirënjohur kosovar që jeton në Paris, Arben Bajraktaraj, në bashkëpunim edhe me Simon Pitaqaj e Merita Gashin. Ditë më parë në Paris është shfaqur para publikut francez edhe drama tjetër e Nezirajt "Lufta ne kohën e dashurisë" (La Guerre au temps de l'amour), e përkthyer në frëngjisht nga Anne-Marie Bucquet. Prezantimi është bërën Maison d'Europe et d'Orient - MEO (Shtëpia e Evropës dhe Orientit).