Kush ishte Themistokli Gërmenji

Llambi Dhimoshi, në prononcimin e tij për mediat, tha se ka trashëgimi në shtëpinë muze të Themistokli Gërmenjit nga nëna e tij, Mardella Pendavinji, mbesë kjo e gruas së Themistokli Gërmenjit. Meqenëse Themistokli Gërmenji nuk ka pasur fëmijë, shtëpinë e tij pas vdekjes e kanë trashëguar më të afërmit nga ana e gruas. Dhimoshi thotë se në vitin 1996, me vendim të Komisionit të Kthimit të Pronave atëherë, i është njohur si pronë shtëpia e Themistokli Gërmenjit. Më pas është lidhur një kontratë qiraje me Ilir Vocin, që ky i fundit ta shfrytëzonte në përdorim për një periudhë 10-vjeçare shtëpinë, deri në vitin 2006.

Themistokli Gërmenji ishte patriot dhe një nga figurat më të njohura të periudhës së pavarësisë. Ai hyri në historinë shqiptare me rezistencën që u bëri grekëve, falë mbështetjes që arriti të sigurojë nga francezët. Bashkë me patriotë të tjerë ai mundi të shpallë “autonome” krahinën e Korçës. Ai mori detyrën e prefektit të policisë, por arriti të hartojë mjaft rregullore për administratën publike, për financat, arsimin, policinë, gjyqet, buxhetin etj. Kujdes i kushtoi sidomos zhvillimit ekonomik të krahinës. Shkollat greke u mbyllën, për t'u hapur rreth dhjetë shkolla fillore shqipe, gjithashtu edhe një shkollë e mesme. Në nëntor të vitit 1917, elementë shovinistë grekë montuan fshehurazi një proces kundër Themistokli Gërmenjit, duke e akuzuar atë për tradhti dhe si agjent të austriakëve. Një gjyq ushtarak i Armatës së Lindjes, në Selanik, e dënoi atë me vdekje dhe e ekzekutoi më 9 nëntor 1917.