Lojërat promocionale, rregulla të reja për kompanitë
Kompanitë duhet të licensohen nëse duan të organizojnë lojëra fati për të nxitur shitjet e produkteve
TIRANË- Qeveria vendos rregulla të reja për kompanitë tregtare që organizojnë lojëra fati me qëllim promovimin e produkteve të tyre. Nëse një shoqëri tregtare vendos të ndjekë këtë rrugë për të rritur shitjet apo për të shpërblyer klientët e saj, duhet që medoemos të përshtatet me kushtet e përcaktuara në vendimin e Këshillit të Ministrave, pasi në të kundërt nuk përfiton autorizimin për organizimin e tyre.
Kështu, sipas VKM-së së miratuar dje, kushti themelor që një kompani duhet të përmbushë për të qenë brenda rregullave, ka të bëjë me çmimin që përfitojnë ata që shpallen fitues, i cili në total asnjëherë nuk mund të jetë më pak se 80 për qind e shumës së mbledhur prej pjesëmarrësve në lojë.
Nësë një kompani zgjedh të organizojë një llotari promocionale me anë të mesazheve, atëherë kjo e fundit duhet që më parë t'i bëjë të ditur pjesëmarrësve në lojë edhe autoriteteve mbikëqyrëse vlerën e SMS-së, i cili nuk mund të kushtojë më shumë se 100 lekë me TVSH. E njëjta gjë vlen edhe nëse loja organizohet nëpërmjet telefonatave, ku sipas VKM-së së miratuar dje, nuk mund të ketë çmim më të lartë se 200 lekë me TVSH.
Autorizimi
Për vetë faktin se organizimi i lojërave promocionale ka një specifikë ndryshe nga lojërat e zakonshme të fatit, për organizimin e tyre është i domosdoshëm një autorizimi i posaçëm nga Ministria e Financave.
Për marrjen e autorizimit, bashkë me dokumentacionin e nevojshëm, kompania tregtare duhet të derdhë, për llogari të saj, një shumë prej 200 mijë lekësh. Kjo shumë është e kthyeshme nëse kërkesa e kompanisë për tu pajisur me autorizim refuzohet nga Ministria e Financave.
Për përftimin e autorizimit, subjekti duhet të paraqesë pranë autoritetit të financave, kërkesë me shkrim ku të bëhet një përshkrim i shkurtër i natyrës së lojës; vërtetim nga Qendra Kombëtare e Regjistrimit; vërtetim nga tatimet se nuk ka detyrimë të pashlyera; rregulloren dhe një përshkrim të hollësishëm për mënyrën e organizimit të lojës promocionale.
Për sa i përket rregullorës së lojës, Këshilli i Ministrave ka vendosur që krahas të dhënave të tjera ajo të përmbajë detyrimisht, kohëzgjatjen e parashikuar nga organizatori; sasinë dhe mënyrën e shpërblimit të fituesve; vlerën monetare, me dha pa TVSH që duhet të paguajë pjesëmarrësi; shpërblimin e parashikuar për fituesit dhe numrin e parashikuar të pjesëmarrësve në të.
Gjatë shpërndarjes së çmimeve për fituesit, kompania tregtare duhet të bëjë kujdes që në ceremoni të marrin pjesë edhe përfaqësues nga Njësia e Mbikëqyrjes së Lojërave të Fatit dhe drejtoria rajonale tatimore. Në rast të kundërt, kompania humb të drejtën për të organizuar lojëra promocionale për një periudhë tre vjeçare.