MB apel qytetarëve për të tërhequr letërnjoftimet

Ministria e Brendshme u bën thirrje të gjithë qytetarëve shqiptarë, që kanë aplikuar për kartat e identitetit, që ti tërheqin këto në zyrat përkatëse. Nëpërmjet një deklarate për shtyp, zëdhënësi i kësaj ministrie, deklaron se procesi i pajisjes së qytetarëve shqiptarë me letërnjoftime elektronike po ecën me ritme të kënaqshme. Sipas tij, mbi gjysmë milion shqiptarë që kanë aplikuar deri më tani, kanë dhënë kontributin e tyre për realizimin me sukses të aksionit të madh kombëtar për pajisjen e shtetasve me dokumentet e reja të identitetit. Kanë aplikuar deri më tani mbi 500 mijë qytetarë, janë prodhuar 403 744 letërnjoftime elektronike, nga të cilat 306 560 janë dërguar në zyrat e shpërndarjes. Ju informojmë se pranë zyrave përkatëse janë dërguar të gjitha letërnjoftimet për aplikimet deri më 31 Mars, ka bërë të ditur zëdhënësi Konja. Nëpërmjet kësaj deklarate, Ministria e Brendshme u bën thirrje të gjithë atyre personave që nuk zotërojnë pasaportë dhe ende nuk kanë aplikuar për letërnjoftim elektronik, që të aplikojnë dhe të pajisen me letërnjoftimin elektronik.