Monchengladbach zyrtarizon Xhakën

Siç është pritur, Borussia Monchengladbach të premten e ka zyrtarizuar transferimin e Granit Xhakës nga Baseli. Klubi nga Bundesliga, nëpërmjet ueb faqes së vet, të premten ka njoftuar se ka nënshkruar kontratë pesëvjeçare me mesfushorin kosovar.

Sipas këtij njoftimi, Xhaka do t’i mbrojë ngjyrat e Borussia Monchengladbach deri më 30 qershor të vitit 2017.

Gjermanët janë gëzuar që i kanë siguruar shërbimet e reprezentuesit zviceran, me të cilin ata besojnë se në edicionin e ardhshëm do të jenë edhe më të fortë në elitën e futbollit gjerman.

“Në përpjekjet tona të vazhdueshme për t’i siguruar shërbimet e Xhakës, kemi pas konkurrencë të fortë nga klube të mëdha evropiane, të cilat insistonin për t’i siguruar shërbimet e tij. Andaj jemi të lumtur që në fund ishim ne ata që i siguruam shërbimet e tij”, ka deklaruar drejtori sportiv i Borussia Monchengladbach, Max Eberl.

Xhaka kishte kontratë me Baselin deri në vitin 2015. Por, gjermanët e zviceranët janë pajtuar që mos të publikohet shuma e dëmshpërblimit që Borussia Monchengladbach e ka derdhur në arkën e Baselit.

Por, mediat gjermane dhe ato zvicerane raportojnë se ky transferim klubit gjerman i ka kushtuar rreth 8.5 milionë euro. Ndërkohë, nuk dihen ende pagesat që gjermanët do t’ia bëjnë prishtinasit për shërbimet e tij, por kjo pritet të mësohet në ditët në vijim.

Në edicionin e ardhshëm, Xhaka do ta bartë fanellën me numër 34 të Borussia Monchengladbach, e cila në edicionin e ardhshëm do të garojë edhe në Ligën e Kampionëve, pasi sivjet garat në Bundesligë i ka përmbyllur në pozitën e katërt të tabelës.