Operacioni Levis, dy në pranga për kontrabandë

Dy persona kanë përfunduar në prangat e policisë së kryeqytetit për kontrabandë, ndërkohë që është sekuestruar malli i tyre, me vlerë mijëra eurosh. Operacioni “Levis” për zbulimin e linjës së kontrabandës është ndërmarrë nga antikrimi ekonomik, i cili ka sjellë prangosjen e tregtarëve. Artan Terziu, 34 vjeç dhe Arjon Lazimi, 21 vjeç, janë prangosur mëngjesin e djeshëm, pasi kishin futur mallra kontrabandë nga Porti i Durrësit. Burimet e policisë saktësuan se tregtarët kanë arritur të fusin në Shqipëri 2300 palë këpucë, 1800 bluza dhe 1350 çanta dore, të cilat janë sekuestruar nga krimi ekonomik në policinë e kryeqytetit. Kjo e fundit saktëson se hetimet për këta persona kishte disa kohë që kishte nisur, në bazë të informacioneve të marra në mënyrë operative. Gjithashtu në Policinë e Tiranës kishte mbërritur një informacion nga Tatim-Taksat për personat në fjalë dhe në bazë të verifikimeve dhe vëzhgimeve në terren është bërë i mundur dokumentimi i veprës penale dhe referimi i saj në prokurori nën akuzën e “kontrabandës”. Pas arrestimit të Terziut dhe Lazimit, agjentët e sektorit të krimit ekonomiko-financiar në policinë e kryeqytetit kanë kontrolluar në ambientet ku dyshohej se tregtohej ky mall, ndërsa bllokuan vetëm mallin kontrabandë.

Ky është rasti i dytë që policia sekuestron mallra kontrabandë që mbërrijnë në Shqipëri, kryesisht nga Turqia. Kontrabandistët përdorin pikat e kalimit kufitar, kryesisht ato detare. Disa ditë më parë, policia ndërmori operacionin “udhëtari” dhe prangosi një biznesmen dhe dy shoferët e tij. Ata kishin kontrabanduar nga Turqia rreth 20 mijë palë këpucë dhe nuk kishin paguar asnjë detyrim doganor si dhe tatime e taksa. Nisur nga të dhënat e fundit, Policia e Tiranës deklaron se do të bashkëpunojë me doganat dhe tatim-taksat për të mundësuar hetimin e të gjithë personave apo subjekteve private që merren me tregtim të mallrave kontrabandë.