Pare për kerre

Presidenti i Kosovës ka vendosur përfundimisht t’i largojë disa nga veturat që i kanë shërbyer paraardhësit të tij, Ibrahim Rugovës.

Kështu, Zyra e presidentit ka bërë një kërkesë në Komisionin për ekonomi dhe financa të Kuvendit të Kosovës për ndarjen e mjeteve në vlerë prej 350 mijë eurosh në kuadër të investimeve kapitale, të cilat do të shfrytëzohen për blerjen e veturave të reja.

Edhe pse eskorta e presidentit numëron mbi katër vetura, ai ka vendosur që ta përtërijë atë. Se sa vetura do të jenë, këtë nuk e di as zëdhënësi i presidentit të Kosovës, Xhavit Beqiri. Por, sa vetura e ka ndërmend t’i blejë presidenti, këtë ende nuk e di as vetë.

“Nuk është e precizuar se sa makina. Makinat që aktualisht i ka presidenti, pas kontrolleve teknike është konstatuar që janë bukur të vjetra, janë qysh të kohës së se ish-presidentit historik, Rugova. Kërkesa është bërë dhe është miratuar nga Komisioni. Edhe nëse eventualisht shpallet ndonjë tender, do të bëhet në mënyrë transparente dhe legale”, shton ai.

Ndonëse pjesë e eskortës së presidentit, është edhe policia e Kosovës, sipas Beqirit, automjetet do të përdoren për përcjelle të presidentit të Kosovës, pra për nevoja drejtpërdrejt të presidentit Sejdiu.

Ndërsa, kryetari i Komisionit për buxhet dhe financa në Kuvendit e Kosovës, Gani Koci nuk dëshiron të flasë lidhur me këtë temë.

Në kohën kur ish-presidenti i Kosovës, Ibrahim Rugova kishte të njëjtat vetura, Lulzim Zeneli ishte zëdhënës i tij. Në atë kohë, sipas Zenelit, veturat kanë qenë në gjendje të mirë, derisa tash nuk e di se në çfarë gjendje janë.

Megjithëkëtë, ai është i bindur se kërkesa e Presidencës për 350 mijë euro bëhet nga mungesa e një agjende shtetërore dhe politikave funksionale. Zeneli konstaton se këto politika janë të dyshimta.

“Ajo çka është e ditur në Kosovë kemi shpëlarje të parave... është vështirë të gjendet arsyetimi. Këto ndodhin si rezultat i asaj kush mundet me grabllue sa më shumë, duke filluar prej presidentit, e deri te mekanizimi më i ulët”, thekson ai.

Ai ende nuk e di se a ekziston nevoja e presidentit për t’i blerë këto vetura.

Duke e komentuar kërkesën e Zyrës së presidentit Sejdiu, Behxhet Shala, kryetar i Këshillit për të Drejtat e Lirive të Njeriut arsyeton kërkesën e presidentit me një dozë të madhe të ironisë.

“Pse jo? Kosova është vend shumë i pasur, me ekonominë më të madhe në Evropë, nuk janë asgjë ato, i ka kërkuar 350 mijë, duhet t’ia japin 900 mijë euro, në Kosovë nuk ka varfëri, nuk ka papunësi. Të gjitha janë”, thotë Shala i mllefosur.

Ndërsa versioni serioz i Shalës është kështu: “Unë nuk e di kur e kanë ndërmend këta m’u ndalë, deri ku kanë me shku këta? Kur ia shoh veturat, së paku i ka katër deri në gjashtë vetura... Nuk është Kosova vend aq i madh me i shpenzue paratë në luks, thjesht nuk kanë interesim për fatin e këtij populli, për vuajtje”, vlerëson Shala.

Por, kjo çështje edhe përkundër kritikave duket të jetë e pakthyeshme. Presidenti do t’i marrë 350 mijë eurot për blerjen e veturave.

Kështu të paktën ka vendosur Komisioni për buxhet dhe financa, e ka mbështetur të mërkurën kërkesën e Zyrës së presidentit të Kosovës, për ndarjen e mjeteve në kuadër të investimeve kapitale në vlerë prej 350 mijë eurosh për blerjen e veturave.

Ditë më parë, organizata joqeveritare kanë kritikuar ashpër edhe vendimin e Kryesisë së Kuvendit të Kosovës për rritjen e pagave të deputetëve të Kosovës.

Edhe mjekët kanë protestuar ndaj këtij vendimi. Behxhet Shala paralajmëron reagim edhe ndaj kësaj çështjeje. Shpenzimi i parave si për deputetë, ashtu edhe për vetura të presidentit, janë të panevojshme dhe në shpërpushje me gjendjen sociale të punëtorëve të tjerë të shëndetësisë, arsimit dhe sektorëve të tjerë.