Përsërit Brukseli: Heqja e vizave nuk ka asnjë pengesë nga BE
Raporteri i PE-së deklaroi dje në Tiranë se heqja e vizave nuk do të kushtëzohet nga asnjë pengesë dhe se përmbushja e parakushteve kishte lehtësuar vendimmarrjen e Brukselit. Rikonfirmimi i jep një përgjigje edhe aksionit politik të Edi Ramës, i cili po bën çmos ta fusë Shqipërinë në hartën e vendeve të destabilizuara, duke kërkuar me ngulm bllokimin e vendimit për heqjen e regjimit të vizave
Raporteri për Shqipërinë në Komisionin e Jashtëm të Parlamentit Europian Nikolaos Chuntis u prit dje në një takim të veçantë nga ministri i Brendshëm Lulzim Basha. Chuntis u informua mbi progresin e Shqipërisë në fushën e sigurisë së kufijve, lëshimin e dokumentave të sigurta të identitetit, rezultatet e luftës kundër krimit të organizuar e trafiqeve të paligjshme, si dhe bashkëpunimin e shkëlqyer të strukturave ligjzbatuese të Shqipërisë me strukturat homologe të vendeve europiane, e posaçërisht me ato të vendeve fqinje. Në këtë kuadër, Basha njohu raporterin Chuntis edhe mbi marrëveshjet dhe protokollet e bashkëpunimit që Shqipëria ka nënshkruar me këto vende, e po ashtu mbi nivelin e shkëlqyer të bashkëpunimit me organizmat ndërkombëtarë që asistojnë dhe bashkëpunojnë me policinë shqiptare.
Raporteri për Shqipërinë në Komisionin e Jashtëm të Parlamentit Europian Nikolaos Chuntis vlerësoi arritjet e Shqipërisë në të gjitha fushat që kanë të bëjnë me përmbushjen e kritereve për liberalizimin e vizave dhe siguroi për mbështetjen e tij në këtë proces. Z. Chuntis theksoi se përderisa kriteret teknike janë përmbushur, vendet europiane duhet të shprehin besimin dhe të vlerësojnë progresin e Shqipërisë, e po ashtu të japin ndihmesën e tyre për integrimin e plotë të saj në Bashkimin Europian.
Reporteri për Shqipërinë në Parlamentin Evropian, Nikolaos Chountis u prit dje në një takim edhe nga kryetarja e Kuvendit Jozefina Topalli.
Zyrtari i lartë grek i Parlamentit Evropian, dënoi qëndrimet dhe thirrjet antishqiptare të grekëve, demonstruar këto nga një brigatë ushtarake në qendër të Athinës, gjatë një tubimi për ditën e pavarësisë.
Chountis, eurodeputet i Greqisë, tha se “dënojmë aktet që pamë gjatë paradës ushtarake në Greqi”. “Ne duhet t’i evitojmë këto akte, pasi nuk ndihmojnë në miqësinë dhe marrëdhëniet mes dy vendeve dhe dy popujve. Grupi ynë në parlament ka bërë një kërkesë drejtuar qeverisë greke për gjetur fajtorët e për të marrë masat e duhura”, u shpreh ai.
Më tej, në vijim të takimit dypalësh, Chountis dhe Topalli u ndalën në ambicien europiane të vendeve të Ballkanit, ku raporteri tha se beson në proceset integruese për vendet e Ballkanit Perëndimor. Kurse lidhur me shqiptarët, Chountis theksoi se “angazhimin e tij personal, por edhe të grupit në Parlamentin Europian, për të përshpejtuar procedurat për heqjen e vizave për shqiptarët”, tha ai.
Ndërkaq Kryetarja e Kuvendit vuri në dukje se mbështetja gjithnjë e më e fortë që vjen nga komisionerët e BE-së dhe eurodeputetët për heqjen e vizave është për Shqipërinë shumë inkurajuese.
...