Poloni, Oketa në takimin e ministrave të NATO-s

Ministri i Mbrojtjes, Gazmend Oketa, u nis dje për në Krakov të Polonisë për të marrë pjesë në takimin e ministrave të Mbrojtjes të vendeve anëtare të NATO-s. Takimi i ministrave të Mbrojtjes të vendeve anëtare të Aleancës zhvillohet në kuadër të përgatitjeve për samitin e NATO-s, i cili do të mbahet në prill të këtij viti në Strasburg, bëri të ditur zyra e shtypit e Ministrisë së Mbrojtjes. Pjesë e diskutimeve nga të 28-të ministrat e Mbrojtjes gjatë këtij takimi do të jetë gjithashtu edhe transformimi i mëtejshëm i Aleancës, pas hyrjes së Shqipërisë dhe Kroacisë si anëtare me të drejta të plota në të. Ministri Oketa do të marrë pjesë në të gjitha formatet e këtij takimi, që kryesohet nga Sekretari i Përgjithshëm i Aleancës, Jap De Hup Shefer.

Ishujt Maldive njohin Kosovën shtet

Ishujt Maldive njohin zyrtarisht shtetin e Kosovës. Konfirmimi erdhi dje nga ministri i Jashtëm i Maldiveve, Ahmed Shahed, përmes një letre që i ka dërguar homologut kosovar, Skënder Hyseni. Ministri Hyseni deklaroi se meritat për njohjet që i bëhen Kosovës i kanë qytetarët dhe institucionet e vendit. Ishujt Maldive bëhen shteti i 55-të që njohin Kosovën shtet të pavarur dhe sovran. Përmes letrës, shefi i diplomacisë së shtetit Maldive njofton homologun kosovar Skënder Hyseni se vendimi u mor pas shqyrtimit të rrethanave që i përkasin Kosovës dhe faktit se një numër i madh i vendeve e kanë njohur atë. Ministri Hyseni komentoi edhe vizitën e shefit të UNMIK-ut, Lamberto Xanier, në Beograd. Sipas tij, qëndrimi i Prishtinës tashmë është i njohur se nuk e pranon planin gjashtëpikësh të Kombeve të Bashkuara dhe me Serbinë bisedon vetëm si dy shtete të barabarta. Shefi i diplomacisë kosovare tha se Serbia nuk do të ketë sukses me fushatën e saj për të penguar Kosovën në anëtarësimin në organizatat ndërkombëtare. Së shpejti, sipas Hysenit, Kosova do të pranohet në Fondin Monetar Ndërkombëtar dhe Bankën Botërore.