Verifikimi i pronës me ligjin 7501, dokumentet që duhen

Qeveria miratoi dje procedurën dhe dokumentet që duhen për të vërtetuar titullin e pronës së marrë me ligjin 7501. Tashmë ka nisur verifikimi i të gjitha pronave të dhëna me këtë ligj dhe sipas vendimit të djeshëm, çdo qytetar duhet të paraqesë një dokumentacion të caktuar për të vërtetuar se prona i përket atij. Në rastet kur kërkohet korrigjimi i aktit të marrjes së tokës në pronësi, pranë komisionit vendor të vlerësimit të titujve të pronësisë krijohet dokumentacioni i ri ligjor, në bazë të të cilit lëshohet akti i ri i marrjes së tokës në pronësi. Pranë komisionit vendor, qytetari duhet të paraqesë kërkesën për korrigjimin e aktit të marrjes së tokës në pronësi, certifikatën e gjendjes familjare, të lëshuar nga zyra e gjendjes civile e komunës ose bashkisë, ku të pasqyrohet numri i frymëve të familjes bujqësore ose individi, në favor të të cilit do të lëshohet akti i ri i marrjes së tokës në pronësi, sipas gjendjes më 1.8.1991, për ish-anëtarët e kooperativës bujqësore ose më 1.10.1992, për punonjësit e ish-ndërmarrjeve bujqësore. Aktin e marrjes së tokës në pronësi, në origjinal, së bashku me planvendosjen e ngastrës, të konfirmuar nga kryetari i komunës. Planvendosjen e ngastrës që qytetari, sipas informacionit që ka, pretendon se është e pandarë, të hartuar sipas hartës treguese të regjistrimit, në shkallën 1:2500, nga një specialist topograf i licencuar. Vërtetimin e faktit se ka qenë anëtar i ish-kooperativës bujqësore më 1.8.1991, ose punonjës i ish-ndërmarrjes bujqësore, më 1.10.1992. Për këtë, qytetari duhet të depozitojë shkresën, nga Instituti i Sigurimeve Shoqërore, për pagesën ose jo të pensionit, si dhe konfirmimin, cilido qoftë ai, të kryetarit të komunës, për këtë fakt. Nëse, sipas informacioneve të mësipërme, nuk vërtetohet fakti i të qenit anëtar i ish-kooperativës bujqësore ose punonjës i ish-ndërmarrjes bujqësore, qytetari ka të drejtë të depozitojë, pranë komisionit vendor, çdo dokument, që vërteton faktin e mësipërm. Komisioni vendor, në bazë të dokumentacionit të ri, të krijuar pranë tij, vendos për korrigjimin ose jo të aktit të marrjes së tokës në pronësi.