Pronari i Gërdecit: Amerikanët morën lejen për barutin nga Mbrojtja

Dritan
Minxholli rrëfehet në gjykatë: Sasia e barutit dalë nga demontimi është
sistemuar fillimisht në depot ekzistuese, pastaj në kantier. Ka qenë pala
amerikane ajo që ka siguruar lejen në Ministrinë e Mbrojtjes në strukturat e
saj për eksportin e barutit për procesin e parë dhe të dytë. E gjithë sasia e
barutit e cila më datën 15 mars 2008 mund të ketë shkaktuar katastrofa të mëdha,
gjatë kohës që kam drejtuar fabrikën nuk më është vënë në alarm nga specialistët
apo administratori Patrik Henry

Tiranë, 5 Shkurt NOA - Dritan Minxholli ka
treguar sot se një ditë para tragjedisë së Gërdecit, ai së bashku me Patrit
Henryn dhe Mihal Delijorgjin janë takuar në Tiranë dhe në këtë mënyrë, pronari
i punishtes fatale ka çelur gojën duke folur për togat e zeza.

Minxholli sqaroi se takimi është kryer në
zyrën e Delijorgjit dhe deklaroi se biseda ka pasur si qëllim të tij njohjen e
administratorit të Albademil dhe president të kompanisë SAC me shpenzimet
financiare për procesin e demontimit.

Shija e atij takimi më la të kuptoja se i
gjithë procesi i punës do të përfundonte me sukses sepse kishte një konsensus
të plotë të dy administratorëve dhe mbështetjen e tyre, asistencë teknike nga
Patrik Henry dhe financiare nga Mihal Delijorgji, theksoi sot gjatë seancës
Dritan Minxholli.

Sipas tij në këtë takim bosi i kompanisë SAC
kishte firmosur edhe dy kontratat e tij për procesin e demontimit në Gërdec.
Gjatë seancës së sotme dëshmuan edhe 5 dëshmitarë. Një prej tyre Haxhi Hoxha tha
para gjykatës se ditën e ngjarjes i ndjeri Qemal Deliu kishte salduar në
banesën e tij një karrocë, e cila më pas ishte sjellë sërish në fabrikë. Sapo
karroca ishte futur në ambientet e fabrikës kishte marrë zjarr, ndërsa në
dysheme kishte barut.

Gjykata vendosi sot që më datën 8 shkurt të
këtij viti një grup oficerësh të policisë gjyqësore së bashku me avokatët do të
bëjnë këqyrjen dhe fotografimin e sendit të gjetur afër me vendin e
shpërthimit, send i cili dyshohet të jetë një saldatriçe e cila është përdorur
në fabrikën e Gërdecit.

Të pandehur në këtë proces janë 29 persona, të
cilët akuzohen për tragjedinë e ndodhur më 15 mars të dy viteve më parë në
fabrikë të Gërdecit ku humbën jetën 26 persona dhe u plagosën më shumë se 300
të tjerë.

r.b/NOA