Pronat, MB: Bashkia e Tiranës ka shkelur afatet

Ministria e Brendshme duke theksuar rëndësinë e veçantë që i ka kushtuar qeveria transferimit të pronave publike tek njësitë e qeverisjes vendore, hedh poshtë pretendimet e Kryetarit të Bashkisë së Tiranës, Edi Rama lidhur me këtë proces. Sipas kësaj ministrie, Bashkia e Tiranës duke shkelur të gjitha afatet, vendimin e Këshillit të Bashkisë me kërkesat për transferimin e këtyre pronave e ka sjellë pas një viti. Përmes një deklarate për shtyp, ministria e Brendshme reagoi ndaj pretendimeve të Kryetarit të Bashkisë së Tiranës, lidhur me proçesin e transferimit të pronave publike duke theksuar ndër të tjera se ka përfunduar inventarizimi i pronave, i konkretizuar në VKM, dhe nga ana e Bashkisë Tiranë, dëshmohet mungesë serioziteti institucional. Si rezultat i këmbënguljes së vazhdueshme dhe asistencës së stafit të Agjencisë së Inventarizimit dhe Transferimit të Pronave Publike edhe për Bashkinë e Tiranës përfundoi inventarizimi i pronave, i konkretizuar në VKM nr 834 date 13.12.2006. Duke shkelur të gjitha afatet, Bashkia e Tiranës e ka sjellë pas një viti vendimin e Këshillit të Bashkisë me kërkesat për transferimin e këtyre pronave Vazhdimisht nga Bashkia e Tiranës kanë ardhur kërkesa të tjera për transferim me ndryshime të njëpasnjëshme, duke dëshmuar një mungesë të qartë serioziteti institucional, thuhet në deklaratën e Ministrisë së Brendshme. Zëdhënësi i kësaj ministrie, Fatmir Konja ka deklaruar se qeveria me një vendim të vitit 2007, ka kaluar në pronësi të Bashkisë Tiranë, trojet për politikat e strehimit për banesa kolektive. Qeveria me VKM nr 610 datë 12.09.2007 ka kaluar në pronësi të Bashkisë Tiranë, trojet për politikat e strehimit për banesa kolektive dhe përsëri kjo bashki ka kërkuar ndryshime me pretendimin se nuk i ka reflektuar të dhënat saktë, dhe pas kësaj qeveria është shprehur përsëri me VKM Nr 211 të datës 25.02.2009, thuhet në deklaratën e MB. Ndër të tjera, në këtë deklaratë bëhet e ditur se procesi i transferimit të pronave nuk do të shërbejë për abuzim me trojet publike. Dëshirojmë ti bëjmë të qartë Bashkisë së Tiranës se procesi i transferimit të pronave publike nuk do të mundet të shërbejë si një mundësi abuzimi me trojet publike duke ua dhënë firmave private si sheshe ndërtimi, përfundon deklarata.