Qafë Krraba, burg pa afat për shoferin e autobusit të AK- së

Elbasan- Burg pa afat është masa e sigurisë që ka dhënë Gjykata e Elbasanit për drejtuesin e autobusit të aksidentuar para pak ditësh në Qafë Karrabë.

Mbi drejtuesin e automjetit Mithat Biçaku, rëndon akuza e shkeljes së rregullave të qarkullimit, dhe për pasojë të shtunën mbetën të plagosur dhjetra aktivistë të Aleancës Kuq e Zi.

Mësohet se autobusi vijon të qëndrojë në vendin e ashtuquajtur Qershitë, pasi edhe sot nuk është bërë e mundur nxjerrja e tij. Kjo ka sjellë që hetimet për të zbuluar shkaqet që çuan rrëzimin e tij, të vonojnë.

Nga hetimet paraprake, Biçaku i është nënshtruar testit të alkolit dhe ka rezultuar negativ, ndërsa sipas përfaqësuesve të AK- së aksidenti ka ardhur si pasojë e një autojeti tjetër, i cili i ka prere disa herë rrugën automjetit duke e detyruar të rrëzohej.

Ngjarja ndodhi ditën e shtunë ku një autobus me aktivisët të Aleancës Kuq e Zi është rrëzuar në Qafë Krrabë dhe për pasojë pati mbi 30 të plagosur. Autobusi po kthehej nga Tirana, pasi aktivistët kishin marrë pjesë në një aktivitet të zhvilluar në kryeqytet.