Rregullat e reja, vendet ku mund të parkohet në Tiranë
Bashkia e Tiranës dhe Policia e Qarkullimit, prej disa ditësh kanë kërkuar që makinat të parkohen vetëm në anën e majtë
Parkimi i makinës në kryeqytet është bërë një makth i vërtet. Për shumicën e qytetarëve që lëvizin me makina, parkimi zgjat me orë të tëra. Madje, makinat lihen vend e pavend duke penguar qarkullimin lirshëm të shumë automjeteve të tjera. Për këtë arsye, si dhe me ardhjen e emigrantëve, Bashkia e Tiranës dhe Policia e Qarkullimit prej disa ditësh kanë kërkuar që makinat në kryeqytet të parkohen vetëm në anën e majtë.
Vendimi
Bashkia e Tiranës ka vendosur që drejtuesit e automjeteve të parkojnë makinën në krahun e majtë të rrugës çdo ditë të hënë dhe të premte, nga ora 22:00 deri në 08:00 të mëngjesit. Për zbatimin e vendimit është ngarkuar Policia e Qarkullimit Rrugor të Tiranës, e cila është treguar e gatshme të bashkëpunojë në këtë iniciativë të bashkisë. Në këtë vendim janë përfshirë 16 rrugët kryesore të kryeqytetit. Në secilën prej tyre janë të vendosura tabelat përkatëse që orientojnë drejtuesit e automjeteve se në cilën anë duhet të parkojnë, ditët dhe orarin përkatës.
Burime pranë Bashkisë së Tiranës bëjnë me dije se kjo masë është një domosdoshmëri dhe rrjedhojë e situatës së pastrimit në qytetin e Tiranës, ku në disa nga arteriet kryesore, makinat e parkuara bëhen pengesë për pastrimin e rrugës. Në këtë mënyrë, është gjetur një zgjidhje që do të kombinojë ditët dhe oraret e parkimit, të cilat do të sinjalizohen edhe me anë të tabelave në rrugë.
Lehtësimi
Mënyra e re e riorganizimit të qarkullimit të automjeteve pritet që të lehtësojë në mënyrë të theksuar parkimin e makinave. Pjesën më të madhe të tyre i gjen të parkuara në trotuar apo në parkingje private. Ndërkohë që në të gjithë Tiranën nuk mund të gjesh një parcelë parkimi publik. Kjo në mënyrë të theksuar ka vështirësuar qarkullimin e lirshëm të automjeteve që kërkojnë korsi të veçanta, si makinat e zjarrfikësve dhe autoambulancat.
Rrugët, të cilat janë përzgjedhur për të zbatuar këtë vendim, janë pika lidhëse të kryeqytetit.
Rrugët ku zbatohet ky vendim
Nr RRUGËT ORARI DHE DITËT
1 Myslym Shyri hënë & premte
22.00-08.00
2 Mine Peza hënë & premte
22.00-08.00
3 Ded Gjo Luli martë & enjte
22.00-08.00
4 Luigj Gurakuqi martë & enjte
22.00-08.00
5 Sami Frashëri hënë & premte
22.00-08.00
6 Perlat Rexhepi hënë & premte
22.00-08.00
7 Gjin Bue Shpata hënë & premte
22.00-08.00
8 Rr. Kavajës hënë & premte
22.00-08.00
9 Rr. Durrësit hënë & premte
22.00-08.00
10 Bul. Bajram Curri hënë & premte
22.00-08.00
11 Bul. Zhan D’ Ark hënë & premte
22.00-08.00
12 Vaso Pasha martë & enjte
22.00-08.00
13 Ismail Qemali martë & enjte
22.00-08.00
14 Pjetër Bogdani hënë & premte
22.00-08.00
15 Nikolla Tupe hënë & premte
22.00-08.00
16 Brigada 8 hënë & premte
22.00-08.00