Shamku në Tiranë: Berisha theu besimin e shqiptarëve

Kandidatja për deputete e PS për qarkun e Tiranës, Ledi Shamku ka rikujtuar dje një nga shumë premtimet e pa mbajtura të qeverisë Berisha, premtime me të cilat, sipas saj u  mori votat shqiptarëve në zgjedhjet e 2005. Gjatë fjalës së saj, Shamku u shpreh se edhe një herë Berisha po tregohet i pandershëm me popullin shqiptar. Vetëm pak vite më parë, Berisha premtoi për të rritur shpenzimet e arsimit, me 5 % të Prodhimit të Brendshëm Bruto. Ky është premtimi numër 1 i pambajtur i Berishës. Ai pati 4 vjet kohë për të realizuar atë premtim dhe deri tani fondet janë rritur më pak se 1 %. Berisha tani përsëri premton të rrisë fondet për arsimin në 5 % të Prodhimit të Brendshëm Bruto.
A mendon Berisha se populli shqiptar është kaq i pa mend, që të harroj premtimin e pak viteve më parë, të cilin nuk e mbajti? Berisha theu premtimin e tij përsëri. Tani ai po bën një tjetër premtim bosh, duke u përpjekur të gënjejë përsëri popullin shqiptar. Berisha është akoma praktikues i politikës së vjetër. Shqipëri meriton më të mirën. Shqipëria meriton një politikë të re, theksoi ajo. Sipas Shamkut, Shqipëria  meriton Edi Ramën dhe Partinë Socialiste.