Shitem Ibren dhe Tiago Silven te PSG

Ndërsa Mino Raiola dhe Leonardo kanë negociuar tre orë për akordin rreth rrogës së Zlatan Ibrahimoviç, me Paris Seint Zhermen që ofron 9 milionë euro në sezon, ndërsa sulmuesin që pretendon 12 milionë, vula për mbylljen e marrëveshjes u vendos nga presidenti i Milanit, Silvio Berluskoni.
Numri një i “Djallit” ka zbuluar gjatë një mbledhje të partisë PDL se “Ibrahimoviç dhe Tiago Silva do të bëhen pjesë e PSG-së”. Me fjalë të tjera, bomba e merkatos, që do të trasferonte dy yjet e Milanit në Paris duket praktikisht e përfunduar.
Mungon ende zyrtarizimi, por tashmë duket se bëhet fjalë thjesht për detaje dhe në këtë pikë erdhi edhe dorëzimi i Berluskonit. “Kam kursyer 150 milionë euro”, ishte batuta e thënë nga kreu i klubit kuqezi, duke shtuar se do të ishte “papërgjegjshmëri nëse do të refuzonte shifrën e ofruar nga PSG”. 
Gjithashtu Berluskoni konfirmoi se mungon ende akordi ndërmjet Ibrahimoviç dhe klubit francez për rrogën. Në fakt, bëhet fjalë për një operacion që më saktësisht kap vlerën e 170 milionë eurove. Kjo duke qenë se 62 milionë eurove që do të shkojnë në arkat e Milanit për kartonët e dy lojtarëve, klubi italian kursen 108 milionë euro nga rrogat: 48 milionë euro bruto për rrogën e Ibrës dhe 60 milionë për atë të Tiago Silvës.
Me fjalë të tjera, sulmuesi dhe mbrojtësi do të luajnë në Ligën e Parë franceze. Gjithçka do të ndryshojë vetëm në rast të surprizave të minutës së fundit, të papriturave apo prishjes së akordit në negociatat më të pabesueshme të kësaj merkatoje.