Shtatë vende, 11 letër-porosi për Drejtësinë shqiptare

Në Gjykatën e Tiranës kanë mbërritur 11 kërkesa penale për ekzekutimin e letër-porosive që shtetet e tjera i bëjnë drejtësisë shqiptare. Në to shtetet dërguese kërkojnë marrjen e informacionit për shtetasit shqiptarë, apo pyetjen dhe depërtimin e tyre për t’u gjykuar në vendet ku kanë kryer vepra penale. Nëntë kërkesa janë shqyrtuar dhe togat e zeza kanë shqyrtuar nëntë prej tyre, ndërsa për dy prej tyre nuk është vendosur ende. Duke iu referuar të dhënave të Gjykatës së Faktit, shtatë kërkesa janë pranuar, një është pranuar pjesërisht dhe për një tjetër është shpallur moskompetencë, pasi ajo i takon si çështje Gjykatës së Krimeve të Rënda. Anglia, Franca, Italia, Rumania, Mali i Zi, Greqia dhe Kosova janë vendet që kanë dërguar letër-porosi pranë autoriteteve të Drejtësisë shqiptare, të cilët ia kanë deleguar ato menjëherë prokurorisë dhe kjo e fundit i ka çuar në gjykatë. Në një rast, personat që duhet të pyeteshin nuk janë gjetur dhe njoftuar për shkak të ndryshimit të adresës së tyre. Personat mendohet se kanë dijeni për ngjarje që janë në hetim në shtete të tjera, por në përgjithësi ata janë vetë pjesë e hetimeve, pasi akuzohen për vepra të ndryshme penale të kryera në vendet që kanë bërë kërkesë. Kosova ka sjellë kërkesën për një shqiptar me banim në Tiranë, pasi ky i fundit është proceduar penalisht nga autoritete kosovare për falsifikim të dokumenteve. Vetëm rasti i Britanisë së Madhe është shpallur si moskompetencë, pasi personi akuzohet se ka kryer trafik të lëndëve narkotike në Angli dhe kjo kërkesë do të shqyrtohet nga Gjykata e Krimeve të Rënda.