Të ardhurat, raporti me BE-në, sa para një shekulli

Edhe pse prej vitesh shqiptarët presin me padurim të bëhen pjesë e Bashkimit Europian, me shpresën për t’i shpëtuar varfërisë së tejzgjatur, pas 20 viteve tranzicion vazhdojmë të mbetemi populli më i varfër i kontinentit, me standarde jetese disa herë më të ulëta se sa mesatarja e Bashkimit Europian. Sipas Institutit Europian të Statistikave, një shqiptar konsumon në një vit 3.3 herë më pak se sa një qytetar i Bashkimit Europian. Boshnjakët dhe maqedonasit konsumojnë 2.7 herë më pak se sa qytetarët e BE-së, serbët 2.3 herë më pak, ndërsa malazezët 1.8 herë më pak.
Të dhënat tregojnë se ky hendek për Shqipërinë po ngushtohet shumë ngadalë. Edhe pse Shqipëria është konsideruar si një nga vendet me rritjen më të lartë ekonomike në Europë, mirëqenia e shqiptarëve po rritet shumë ngadalë. Jo vetëm në raport me Bashkimin Europian, por edhe me disa vende të ish-bllokut lindor, që dikur ishin njësoj të varfër sa Shqipëria. Sipas EUROSTAT, të ardhurat që fiton mesatarisht një shqiptar janë sa 26 për qind e mesatares së Bashkimit Europian. Bosnja e ka këtë tregues 31 për qind, Maqedonia 33, ndërsa Polonia dhe Kroacia respektivisht 56 dhe 63 për qind. Me këto ritme të rritjes së mirëqenies, do të duhen shumë dekada që shqiptarët të mund të krahasohen ekonomikisht jo vetëm me Perëndimin, por madje edhe me disa prej fqinjëve tanë të rajonit, të cilët po pasurohen më shpejt se ne. Deri tani Shqipëria ka humbur shumë kohë dhe për ironi tragjike shqiptarët janë sot po aq të varfër ndaj Bashkimit Europian sa ishin një shekull më parë. Sipas “The Economist”, të ardhurat për frymë të shqiptarëve janë sot 26 për qind e Bashkimit Europian, ku në vitin 1910, kur shteti shqiptar nuk ekzistonte, të ardhurat ishin po kaq.