Vlorë, falsifikoi dokumentet e pronësisë, ndjekje penale ndaj 53 vjeçares

Policia e Vlorës ka nisur hetimin në gjendje të lirë për një 53- vjeçare nga qyteti, pasi dyshohet të ketë falsifikuar për qëllime përfitimi dokumentet e një objekti, në pronësi të një bashkëqytetari. Burime zyrtare të policisë lokale bënë të ditur se, 53-vjeçarja B. Kuçi do të hetohet penalisht në gjendje të lirë me akuzën e falsifikimit të dokumenteve zyrtare. Sipas të njëjtave burimeve, kjo shtetase kishte paraqitur pranë organeve vendimmarrëse lokale dokumentet e pretendimit të pronësisë së një objekti, që, në fakt, i përkiste një shtetasi tjetër, i cili bëri dhe kallëzimin në komisariat. Ndaj 53-vjeçares nisi çështja penale, ndërsa dosja iu përcoll prokurorisë. Falsifikimi i dokumenteve zyrtare të pronësisë përbën një nga dukuritë shqetësuese, me të cilën përballen aktualisht organet e hetimit në qytetin e Vlorës. Vetëm gjatë këtij viti, prokuroria dhe policia kanë nisur hetimin për të paktën 5 raste. Ndërsa vjet, në gjykatën e Vlorës, u shqyrtuan 500 konflikte pronësie, në një pjesë prej të cilave, palët pretendonin për të njëjtin objekt, truall, apo sipërfaqe toke, me dokumente të siguruara në forma të ndryshme.