Vrasësi montoi 600 gr tritol në televizor

Ngjarja në Sauk, hakmarrje për një vrasje të kryer 13 vite më parë nga Xhevdet Xhebrahimi

Atentat për motive hakmarrjeje, për një vrasje të ndodhur 13 vite më parë, është klasifikuar ngjarja e para dy ditëve në familjen Xhebrahimi. Drejtori i Drejtorisë së Policisë së Tiranës, Tonin Vocaj, në një konferencë për shtyp ka zbardhur motivet dhe detajet e ngjarjes që tronditi lagjen Sauk të Tiranës, ku 2 persona humbën jetën dhe u plagosën 3 të tjerë.

Policia deklaroi se ka arrestuar Luan Dervishin si autor të dyshuar të vrasjes. Sipas policisë, Xhevdet Xhebrahimi kishte vrarë, për motive të dobëta, në 1997-n Naim Dervishin, xhaxhanë e autorit të dyshuar. “Autori ka blerë një televizor 32-polësh në një nga supermarketet e Tiranës dhe pasi ka montuar në të një sasi eksplozivi prej 600 gramësh tritol, e ka dërguar në banesën e viktimës. Në momentin kur 71-vjeçari së bashku me të afërmin e tij, Luan Brahja, 36 vjeç, kanë tentuar të vënë në punë televizorin, ka shpërthyer eksplozivi. Drejtori i policisë, Vocaj, nënvizoi se ka prova të mjaftueshme që vërtetojnë se Luan Dervishi, 25-vjeçar, nga fshati Picallë i Tiranës, është autori i vrasjes. Ndaj tij është marrë masa e arrestit në flagrancë. Luan Dervishi akuzohet për vrasje me paramendim dhe mbajtje pa leje të municioneve luftarake.

Ngjarja

Rreth orës 09:00 të mëngjesit, në banesën e Xhebrahimëve ka mbërritur kushëriri i tyre, Luan Brahja, i cili punonte si teknik televizorësh. 36-vjeçari, i cili është baba i tre fëmijëve dhe banon jo shumë larg shtëpisë së Xhebrahimit, ka hyrë brenda dhe bashkë me Xhevdetin dhe djalin e tij, Altinin, kanë filluar të vendosin një televizor të ri, që ata sapo e kishin marrë. Pa kaluar as 40 minuta, rreth orës 09:40, ata kanë dashur të fusin në prizë televizorin, por një shpërthim i fuqishëm ka ndodhur në banesë. Gruaja e Xhevdetit, Fatbardha 58-vjeçare, nuk ndodhej shumë larg, djali ishte ulur në kolltuk, ndërsa vajza, Shpresa, ishte në korridor. Të gjithë ndodheshin në katin e dytë të banesës. Shpërthimi ka qenë aq i fortë, sa të gjithë fqinjët janë shtangur. Të gjithë kanë dalë jashtë për të parë se çfarë kishte ndodhur, kur kanë vënë re se gjysma e banesës ishte shembur. Menjëherë, njerëzit janë afruar për t’u dhënë ndihmën njerëzve që ndodheshin brenda, ku Fatbardha kërkonte ndihmë me zë të lartë. Shpërthimi kishte thyer edhe xhamat e makinave dhe të banesave pranë banesës private. Në moment është vënë re se Xhevdeti, rreth 71 vjeç, kishte ndërruar jetë në vend. Plagë të rënda kishte edhe kushëriri i tij 36-vjeçar. Luan Brahja ka ndërruar jetë gjatë rrugës dhe ai e kryefamiljari janë dërguar menjëherë në morgun e Tiranës.

Hetimet

Policia ka mbërritur menjëherë në vendin e ngjarjes dhe ka rrethuar banesën ku ndodhi shpërthimi. Më vonë, në vendin e ngjarjes kanë mbërritur edhe forcat e FNSH-së, të cilat, bashkë me uniformat blu, kanë pastruar gjithë tullat e rrënuara nga shpërthimi, me qëllim për të gjetur vatrën ku kishte shpërthyer lënda plasëse. Ekspertët dyshuan se eksplozioni ishte shkaktuar nga eksplozivi, dhe në vendin e ngjarjes kanë mbërritur ekspertët përkatës, që nisën menjëherë kërkimet. Hetimet e policisë kanë vijuar deri në orët e vona të mbrëmjes, dhe më në fund ata arritën në përfundimin se eksplozivi ishte montuar në televizor, pasi pranë murit ku ishte vendosur ai ishte krijuar një vrimë e madhe.

#